വെള്ളി...

വെള്ളിയാഴ്ചകള്‍ എനിക്ക് എന്നും പ്രിയപ്പെട്ടതായിരുന്നു..
ആഴ്ചയിലെ അവസാന സ്ക്കൂള്‍ ഉള്ള ദിവസം..
രാത്രി ദൂരദര്‍ശനില്‍  ചിത്രഗീതം ഉള്ള ദിവസം..
രാത്രി ഹിന്ദി സിനിമാ ഉള്ള  ദിവസം..
ബാലരമ വരുന്ന ദിവസം..
ചൊവ്വാഴ്ചയിലെ ബാലമംഗളം പോസ്റ്റില്‍ വീട്ടില്‍ എത്തുന്ന ദിവസം..
കോളേജില്‍ ആയപ്പോള്‍ വലിയ ഇന്റര്‍വെല്‍ ഉള്ള ദിവസം..
ലൈബ്രറിക്ക് മുമ്പില്‍ വായ് നോക്കാന്‍ ഇരിക്കുന്ന ദിവസം..
ഓര്‍ക്കുട്ടില്‍ ഏറ്റവും  കളക്ഷന്‍ ഉണ്ടാകുന്ന സായാഹ്നങ്ങള്‍..
രാത്രി പപ്പടവും  സാമ്പാറും  ഉള്ള  ദിവസം ..
രാത്രി  പ്രേതം  ഇറങ്ങുന്ന  ദിവസം..

സ്ക്കൂളില്‍ പഠിക്കുന്ന സമയത്ത്  വെള്ളിയാഴ്ച രാത്രി കിടന്നുറങ്ങുമ്പോള്‍ എന്റെ കാലു മിക്കവാറും ചേട്ടന്റെ പുറത്ത്  ചുറ്റി കാണും ..
കഷ്ട്ടകാലത്തിനു വല്ല ചൊക്ക്ലി പട്ടിയും കുരച്ചാല്‍ പിന്നെ പറയേ വേണ്ട..
വെള്ളിയാഴ്ചകളില്‍ പട്ടികള്‍ രാത്രി കൂടുതലായി കരയുന്നതായി നമുക്ക് തോന്നും...
ചെലവന്മാരോക്കെ അത് പ്രേതത്തെ കാണുമ്പോള്‍ കുരക്കുന്നതാനെന്നൊക്കെ പറയും..
സത്യത്തില്‍ വെള്ളിയാഴ്ച ക്രിസ്തവര്‍ക്ക് മാംസം ഹറാം ആയതോണ്ട് ഒട്ടു മിക്ക ചൊക്ലി പട്ടികളും പട്ടിണി ആയിരിക്കും..
'പട്ടിണിയുടെ ശബ്ദം  ഭയാനകമാണെന്ന്' ' പ്രമുഖ പേരറിയാത്ത റഷ്യന്‍  സാഹിത്യക്കാരന്‍ പറഞ്ഞത് എത്രയോ കറക്റ്റ് ആണ്..

പുലിവാല്‍ കല്യാണത്തില്‍ ജയസുര്യക്ക് എഞ്ചിനീയറിംഗ് എന്ട്രന്സില്‍  ഒന്നാം റാങ്ക് കിട്ടുന്ന സീന്‍  ഉണ്ട്..
വല്ല നൂറാം റാങ്ക്  എങ്ങാനും ആണെങ്കില്‍ ഞാന്‍ ക്ഷമിച്ചേനേ
( ആ സമയത്ത് നമ്മള്‍  റാങ്ക് അഞ്ചക്കം കടന്നു നക്ഷത്രം എണ്ണി ഇരിപ്പാര്‍ന്നല്ലോ..)..
മിമിക്രി കാണിച്ചു നടക്കുന്ന ജയസൂര്യക്ക്  പറ്റുമെങ്കില്‍ എന്ത് കൊണ്ട്  നിനക്ക് പറ്റിയില്ല എന്നൊരു ചോദ്യം സ്വാഭാവികമായും നമുക്ക് നേരെ ഉയര്‍ന്നേക്കാം..
ഈ  വെള്ളിയാഴ്ച രാത്രി 12 മണിക്കാണ്  പ്രേതം  ഇറങ്ങുക  എന്നൊരു ധാരണ മലയാളിയുടെ മനസ്സില്‍ ഉണ്ടാക്കിയത് സിനിമകള്‍ ആണെന്ന്  പറയാം...
വെള്ളിയാഴ്ച രാത്രി 12 മണി ആയാല്‍ പിന്നെ അത് ശനിയാഴ്ച പുലര്‍ച്ചെ  അല്ലേ എന്ന്  ചില ബുദ്ധി ജീവികള്‍ ചോദിച്ചത്  കൊണ്ടാണെന്ന് തോന്നുന്നു..
ഇപ്പൊ പ്രേത   സീരിയലുകാരോക്കെ പ്രേതം ഇറങ്ങുന്ന  ടൈം ഒരു 11 മണി 11 :30 ആക്കിയിട്ടുണ്ട്..

ഒമ്പതില്‍ പഠിക്കുമ്പോള്‍ ഞാന്‍ പ്രേതത്തെ അന്വേഷിച്ചു രാത്രി ലാലൂര്‍ പൊതുശ്മശാനത്തിലേക്ക് ഒരു സൈക്കിള്‍  സവാരി നടത്തിയിട്ടുണ്ട്...അന്ന് കഷ്ട്ടകാലത്തിനു(പ്രേതത്തിന്റെ) ,  വഴിയില്‍ എന്റെ  ആറ് വീട് അപ്പുറത്തെ മീന്‍ക്കാരന്‍ എന്നെ കണ്ടു വീട്ടിലേക്കു ഓടിപ്പിച്ചു വിട്ടു..പിറ്റേന്ന് അങ്ങേരു വന്നു  അമ്മയോട് കാര്യവും പറഞ്ഞു...
അതെപ്പോഴും അങ്ങനെയേ സംഭവിക്കൂ..!
ഞാന്‍ പള്ളിയില്‍ പോകുമ്പോഴോ,പുത്തന്‍ പള്ളിയില്‍ കുമ്പസാരിക്കാന്‍  പോകുമ്പോഴോ ,വല്ലടത്തും ധ്യാനത്തിന് പോകുമ്പോഴോ  ഒറ്റ ഒരുത്തനെ കാണില്ല..
കഷ്ട്ടകാലത്തിനു രാത്രി വല്ല പാടത്തോ,പുഴയുടെ അടുത്തോ പോയാല്‍ കണ്ണില്‍പ്പെടാന്‍  ഒരു നൂറു പേര് ഉണ്ടാകും..

ചില മീന്‍ കച്ചോടക്കാരികള്‍  എന്നെ പാടത്ത് കണ്ടു മറ്റടത്തു  കണ്ടു മറച്ചടത്തു കണ്ടു എന്നൊക്കെ പറഞ്ഞു വീട്ടില്‍ വന്നു അമ്മയുടെ അടുത്ത് ഗോള്‍ അടിക്കും..
ആ പേരും പറഞ്ഞു അമ്മയെ സോപ്പ് ഇട്ടു കള്ളു  കുടിക്കാന്‍ വല്ല പത്തോ ഇരുപതോ വാങ്ങുക ആണ് അവരുടെ പിന്നിലുള്ള നിഗൂഡ ലക്‌ഷ്യം..

വീട്ടുക്കാരുടെ പേരില്‍ ഒന്നും നേടാന്‍ എനിക്ക് താല്പര്യം ഇല്ല എന്ന് തന്നെ പറയാം..
അത് കൊണ്ട് തന്നെ എന്റെ ഓര്‍ക്കുട്ടിലെ  പേര് അഭിലാഷ്.ടി .ആന്റോ എന്നതിന് പകരം ഒളരി അഭിലാഷ് എന്നായിരുന്നു ഇട്ടിരുന്നത് ..
ഗള്‍ഫില്‍ സൂപ്പര്‍വയ്സര്‍  ആയ പിതാശ്രീ ഒരു കര്‍ഷകന്‍ ആണെന്നാണ്‌  കോളേജില്‍ ഓഫീസിലും പ്രിന്‍സിയുടെ അടുത്തും പറഞ്ഞിരുന്നത്..
കോളേജില്‍ മാത്രം അല്ല ജോലി സംബന്ധമായ എല്ലാത്തിനും ഇത് തന്നെയാണ് പറയാറ്..
ഒരിക്കല്‍  കേരള അഗ്രോ ഇന്‍സ്ട്രുമെന്റ്സിന്റെ ഒരു ഇന്റര്‍വ്യൂന്  പോയി..
അന്ന് ഇത് പോലെ കര്‍ഷകന്‍ ആണ് എന്ന് പറഞ്ഞപ്പോള്‍ എന്താണ് കൃഷി,എവിടെയാണ് കൃഷി,എത്ര ഏക്കര്‍ ഉണ്ട് ,അങ്ങനെ അങ്ങനെ കുറെ ചോദ്യങ്ങള്‍ ...

നമ്മള്‍ പെട്ടില്ലേ !!..
തെങ്ങ് കൃഷി ! വാഴ കൃഷി ! മാവ് കൃഷി ! എന്നൊക്കെ പറഞ്ഞു ഒരു വിധം തടി തപ്പി എന്ന് പറഞ്ഞാ മതി..
അല്ലാ..
ഇനി ഇപ്പൊ അവര് അപ്പന്‍ ഗള്‍ഫിലാണെന്ന് കണ്ടു പിടിച്ചാ തന്നെ നമുക്ക് പറയാന്‍ കൃഷികള്‍ വേറെയും ഉണ്ടല്ലോ...!
ഗള്‍ഫില്‍ ഈന്തപ്പഴ കൃഷി,എണ്ണ കൃഷി,ഒട്ടക കൃഷി....അങ്ങനെ...അങ്ങനെ..!


»  വായിച്ചതിനും ഫോളോ ചെയ്യുന്നതിനും നന്ദി..
╰» അഭിലാഷ്
╰» +91 949634 8785 (ഇന്ത്യ) olariabhilash@gmail.com

..